今年9月中，以音樂為主題的「長夢書店」，在上環大約300呎的樓上單位開業。店內最多的當然是書，第二多的可能是熊仔。鬆弛熊、彩虹熊熊、自嘲熊⋯⋯店徽亦是以書為被在睡覺的熊仔，讓店內充滿了悠閒氛圍。

「長夢係『長長的夢』，唔係追夢嘅夢。成日講夢想，但人唔一定要有夢想。這裡是一個空間，讓大家發下白日夢，休息下已經好好。」店主 Ella 說。  

▋迎難而上做鍾意的事

Ella 中學時讀文科，大學時以前景為先，選修數據科學。畢業後從事IT系統搭建，收入水漲船高，她卻很快意識到自己「唔想返工」。「如果我一直做上去，會持續升職加人工，但我覺得嗰樣嘢唔屬於自己，比如做 app，做出嚟完全無滿足感和成功感，每日重複解決用戶問題，就覺得好辛苦。」

於是，她邊打工儲錢，邊思索創業。「想做同自己有關的，我鍾意睇書，又鍾意聽歌、睇騷，想開書店好耐，但都未有『去做啦』的心情。」直到有日她讀到一篇書店結業前的訪問，驚訝地發現店主是她鄰座同事。「他曾經開了兩年多書店，知道我想開書店，會毒舌我，但同時分享好多經驗，如揀書、入書量點控制，我就覺得我都可以去試。」 

開業才數個月，在長夢行一圈，感覺「完成度」很高。「豬肉枱」上放滿了書，牆上貼滿了音樂會、電影、舞台劇等等的海報，唱片架上，已有大約二十個本地音樂單位的 EP 或專輯。店內各處都可見 Ella 親手寫的便利貼，除了介紹書本主題、音樂作品外，亦有她個人反思和感想。

▋「普通人」也可開書店

看書聽歌發夢是輕鬆事，經營書店卻不然。「睇書嘅人係多，但普遍睇書頻密度不高，可能一個月只睇到一本，好耐先會再購入一本書，唔似食飯。」每年新書旺季，書店人流較多，淡季若單靠賣書利潤，難以維持經營。

既知書店難做，為何 Ella 仍要向「苦」山行？「文化是一個城市或地方好重要的一部分，做書店是傳遞文化。書店最平每月俾萬幾蚊租就可以做，但踏出這一步嘅人唔多，市場氣氛好似咩都唔可以做，我就想試下行一小步，做了自己想試嘅野先。」「棄高薪」做鍾意的事，可有猶豫？「有啲嘢係要衝動一啲去做，先至會做到。如果等到錢『夠』先做，錢是永遠都揾唔夠㗎。」

問未從事過文化或音樂工作的 Ella，作為「音樂書店」店長，可會有壓力？行動派的她笑說，「這就是一個例子顯示俾人睇，你唔需要有背景，一個『普通人』都可以去做這件事。有朋友說我應該先在書店打工汲取經驗，不過我又覺得『第一次做有第一次做的魅力』，每日都有驚喜，不會重複」。

「一開頭甚麼都沒有，搵人合作，就係要唔好怕醜。」大學已是聽團仔的Ella，經常看獨立樂隊演出，亦關注多個主辦單位，決定開店後她便逐一聯絡。「我同佢哋講如果有活動或新作可以同我講，可以在店內貼海報宣傳。」結果大部分都有回音，亦不少音樂單位，是在客人介紹下連結。「我覺得好開心，大家都好有愛。」

▋同好知音共享交流

有別於連鎖書店百貨應百客，獨立書店大都有主題和風格，回應特定讀客群的需要，與同好者建立社群。「我覺得開店是跟大家共享這個互動交流的空間，不是我作為店主，去教你睇咩書聽咩音樂。客人覺得有邊本書好睇，都可以跟我分享。有時客人同我介紹好聽的歌，我聽完都鍾意，就會喺書店度播。」

細看唱片架，問 Ella 可有私心推介，她秒答：「個個我都鍾意！呢啲 band 全部都好 nice。」這位不能偏心的店長，本身會聽的音樂類型亦很廣泛。「店內 jazz、lofi、rock 等等嘅音樂都會有，會介紹不同音樂畀客人。」為人與歌牽線，讓她甚有滿足感。「長夢有個每月會員主題歌單，上個月有一首是香港獨立樂隊 COPAK 的歌，有客人話好好聽，就變了粉絲日日都 loop。」

除了唱片，店內特設一個 Music Corner，集中擺放跟音樂有關的書和迷你雜誌。「長夢選書以新出版出籍為主，當中以小說佔多。音樂相關的書籍本身比較冷門，本地出版相關書籍亦不多，大都是關於填詞，至於歷史、專訪類就比較少，所以我多從台灣購入相關書籍。有客人見到後，就話『好神奇呀，成個 corner 都係音樂嘅書嚟㗎』。見到大家上到嚟發現到未見過嘅野，就好開心。」

▋一期一會連繫社群

新手上路，Ella 感恩得到同路人支持。「我有跟其他書店例如界限、獵人、序言店長傾偈，他們都好支持我，會畀實用建議我，亦幫我介紹長夢畀更多人認識，都好多謝佢哋。」

這數個月來，長夢舉辦了不少活動，好幾個都是由創作者親身分享，音樂與書作交熾的火花。10月認識 Ella 的那晚，店內舉行了由作家吳家強、漫畫家林祥焜主持的座談會。「吳家強先生出版了本書叫《街貓關注組》，長夢有賣，有一日他到來，知道這裡以音樂為主題，提起他與摯友林祥焜曾合作做關於夾 band 的漫畫《菓醬》，就組織了座談會。」席間兩位資深創作人除了分享創作心得，亦帶來個人喜歡的音樂作品在場播放分享。 

11月《人在》於長夢舉辦分享會，書中受訪者之一的填詞人陳嘉朗，聯同幾位年青填詞人朋友，漫談創作歷程和分享作品。「每舉辦一個活動，要準備的東西都幾多。雖然好攰好辛苦，但都係開心。我是店主也是參加者，在這個空間，見證人們合作和連結，我覺得好享受。」才剛踏入12月，長夢已推出了四個活動。「希望吸引到更多喜歡音樂，而又鍾意睇書研究音樂嘅人到來。」

撰文及攝影：Lya @_lya.ha